Otru gran desconocíu

Francisco Álvarez — Sun, 12 Apr 2009 17:17:57 +0100

Querida Llectora Intempestiva:

Quedes convidada a una cantidá ilimitada de botelles de sidra por tolos afalagos (la mayor parte inmerecíos, de verdá) por esi vieyu y estrañu llibru qu'escribí n'otra vida.

Ye la primer vez que faen una crítica en condiciones d'ún de los mios llibros y quédote mui agradecíu polos 'pros' y polos 'contras' que plantees a los cuentos.

Voi confesate que me remitió a esti blog pa lleer la to crítica'l mio amigu y coetaneu Xandru Fernández (¡Qué gran collecha la de 1970!), que lleva bien de tiempu acosándome y intimidándome pa que siga escribiendo. El problema ye que nesti mundu hai llectores intempestives como tu y vagos compulsivos como un servidor.

De toes formes, munches gracies.

Francisco Álvarez

------

Antón García, XENERACIONES Y DEXENERACIONES (SOBRE LLITERATURA ASTURIANA) Volume I, Trabe, 2007

Llectora_intempestiva — Wed, 03 Dec 2008 00:35:22 +0100

Gracies, collaciu, por revitalizar el blog con un testu tan orixinal (en tolos sentíos de la pallabra) y elocuente. ¡Que sigan llegando más recomendaciones!

Dolfo Camilo Diaz, KHAOS, Trabe, 2008

Si queréis echar una Güeyada.seronda escura — Sat, 08 Nov 2008 14:07:48 +0100

http://serondaescura.nireblog.com/

Recomendáime cuentos

Ateyavana — Thu, 02 Oct 2008 08:30:54 +0100

El de Xuan Bello apaez en La Memoria del Mundu, y tamién ta na Hestoria...
Si ye verdá que Perreríes ye un poco bestia, asina que pue depender de la xente.
A min gústame mas el primeru d'Aventures, pero paezme que pa un taller da munchu más xuegu'l segundu, por eso te lu puse.
Lo que dices de les llingues minorizaes tien sentíu. Nun se si será esa la razón, pero tien sentíu. El prestixu tienlu la poesía, por exemplu, y onde tea una bona novela...
Salú, y que te vaya bien nos tallerinos. Fai falta que la xente faga coses.

Recomendáime cuentos

Laura — Thu, 02 Oct 2008 00:12:48 +0100

Gracies Ateyavana, yes el meyor, tu sí que respuendes. A mi préstame el primeru d'Aventures polo que tien de reflexar la xeografía urbana de Xixón. De MRC préstame tamién el d'El últimu volador (camiento qu'a el tamién y por eso-y puso el nome al llibru). Tamién pensé nes Falcatrúes, tengo que pensar a ver cual. El de Perreríes dame un poco mieu, meterélu según audiencia, porque si son mui mayores o mui mozos dame un poco palu (anque ye buenísimu y seguro que los adolescentes de güei lu garren con tantu morbu como yo cuando lleí El perfume con trece años).

Ún de los oxetivos del taller ye que la xente s'anime a sacar llibros n'ast de la biblioteca, asina que tengo que xugar colos que tenga per ehí. ¿El de Xuan Bello en qué llibru ta? X B ye la mio asignatura pendiente.

En cuanto a lo que dices del nivel, dixeron nel congresu de lliteratura de l'ALLA del añu pasáu que la narrativa curtia suel ser el puntu fuerte de les lliteratures minorizaes, porque poca xente tien moral y tiempu pa escribir una novela dempués de llegar de trabayar (yá que de la llingua nun se come). Foi nuna conferencia sobre comparación ente la narrativa asturiana y catalana escrita por muyeres (Muyeres con Dones), de Marta López Morales.

Salú (y que s'anime más xente venga, que necesito idees).

Recomendáime cuentos

Ateyavana — Wed, 01 Oct 2008 14:18:01 +0100

Catedral, de Pablo Texón, porque anque se-y vean muncho los referentes que manexa y quede un poco curtiu, ye un cuentu mui guapu, modernu y dignu de llevar a cualquier sitiu.
El Pindal, de Berta Piñán, porque ye un clásicu, ye mui curtiu y date xuegu pa sacar munches llectures d’él. Pues destripalu, vaya.
Perreríes, de Pablo Rodríguez Medina, porque ye’l meyor escritor de cuentos que tenemos y tien que tar, y porque ye una visión del campu bestia a maza que furrula mui bien.
Tamién metería ún de Milio Rodriguez Cueto, a lo meyor el segundu d’Aventures, porque ye mui prestosu de lleer y diba date xuegu nun taller, pa que non toos seyan "sesudos".
Garraría tamién dalgún de “Les falcatrues del demoniu” de Xulio Viejo, pero agora mesmo nun lu atopo pa poder dicite cual, porque ye ún de los llibros de cuentos más compensaos de la nuestra llingua, o polo menos esi recuerdu tengo. Yeren cuentos mui frescos.
Y ún de Xuan Bello, Ros de la llamiella, porque ye un cuentu guapu daveres, que fala de la emigración y de los ritos d'adultu con munchu cariñu, y que tamién te diba dar munchu xuegu.
Y a lo meyor La Ponte, de Miguel Rojo… nun sé, agora que lo pienso vienenme munchos a la cabeza, lo que ta faciéndome pensar que nun hai tan mal nivel.
Salú.

Un xueguín que propongo

Ricardo — Tue, 23 Sep 2008 21:30:01 +0100

Pongo ente paréntesis los qu'amiesto yo. Los demás son de la llista orixinal.

1 - Díes de muncho, Antón García
(2) - Los paraísos perdíos, Pablo Rodríguez Medina
(3) - Hestoria Universal de Paniceiros, Xuan Bello
4 - Les ruines, Xandru Fernández
(5) - Ente semeyances, Pablo Rodríguez Medina
6 - La tierra entero, Berta Piñán
7 - Potestas, Xulio Arbesú
8 - Catedral, Pablo Texón

Un xueguín que propongo

Diestru — Tue, 23 Sep 2008 18:24:39 +0100

Nun vou moyame col orde los llibros, pero sumo trés que lleí, ya peime qu'ameritan tar na llista:

-Potestas, de Xulio Arbesú
-Parque temáticu, de Xosé Nel Riesgo
-Hestoria Universal de Paniceiros, de Xuan Bello

...Hai dalgún qu'inda nun lleí, pero teo munchas ganas!

Un xueguín que propongo

Ateyavana — Tue, 23 Sep 2008 16:39:41 +0100

Mui bones, Laura, tas viva... yá contarás pa qué ye, pero ehí te va:

Les ruines, Xandru Fernández

Díes de muncho, Antón García

Escrito na ceniza, Xosé Nel Riesgo

Aventures, Milio Rodríguez Cueto

El día que nos llevaron al cine, Paquita Suárez Coalla

La tierra entero, Berta Piñán

Histories d’un seductor (memories d’un babayu), Miguel Rojo

Cuentos chinos, José Luis Rendueles

Argonautes, José Ángel Gayol

Catedral, Pablo Texón

Cuentos con neños, Xulio Arbesú

Los aranxales de la vida, Xulio Viejo

L'inmoral, Xulio Vixil

Carretera ensin barru, Naciu Varillas

La banda sonora del paraísu, Xandru Fernández

LA NACIÓN ASTURIANA

unu — Wed, 03 Sep 2008 17:55:51 +0100

Que triste ye entrar a ver los comentarios esperando ver critiques del llibru y alcontrase cola mesma morralla de siempres, que si una pallabra ta bien escrita o mal, que si nun s'usa.... buaggggggggggggggg

Jose Luis Rendueles, LOS MEYORES CUENTOS DEL MUNDU Y OTRES PROSES MONGOLES, Trabe, 2008

Pablo — Fri, 13 Jun 2008 14:58:25 +0100

Hola, soy Pablo de Córdoba, Argentina me interesaría leer literatura asturiana (sobre todo cuentos). Soy estudiante de la Universidad Nacional De Córdoba, de la Facultad de Letras, y siento curiosidad por los libros que se exponen en este blog, me gustaría tener acceso a ellos, ya que desde aquí es muy difícil. Muchas Gracias y sigan así.

Jose Luis Rendueles, LOS MEYORES CUENTOS DEL MUNDU Y OTRES PROSES MONGOLES, Trabe, 2008

gerri — Sat, 31 May 2008 13:33:07 +0100

ITS LOVELYYYYYYYYYYYYYYYYYYY

FRIXUELU EXPERIENCE (o "Cómo come-yos la bola a los medios")

embaxador — Mon, 12 May 2008 01:32:55 +0100

Yo toi d'alcuerdu col autor... Pero qué propón? Qué podemos facer nós, tan avezaos como tamos a poner les polítiques (llingüístiques o non) nes manes de l'alministración?

LA NACIÓN ASTURIANA

El xanu\'l caborniu — Wed, 06 Feb 2008 20:43:15 +0100

Fefe:
"d'acuerdo"
"nel cual"
"yelu"
¿¿¿....???
Doi por acabada la discusión.
Un saludu, que discutir ensin faltase casi ye un milagru güei.

LA NACIÓN ASTURIANA

Fefe — Mon, 04 Feb 2008 19:05:09 +0100

Xanu'l Caborniu, ¿a qué llames tu normativa? ¿Nun confundirás Standard con normativa?

"Cumo", "no lliterariu" son palabres perfechamente normatives, otra cosa ye que seyan variantes occidentales, pero escrites d'acuerdo cola normativa. "*Cumu" por exemplu, sedría una forma que nun s'axustaría a la normativa. L'usu de los grupos consonanticos cultos mal sí ye un ataque a la normativa. ¿Conoces la normativa académica?.

Veo que nun entiendes al rapaz. Si ye falante d'un dialectu ASTURIANU nel cual "asoleyar" y "cadarma" tienen l'usu que'l rapaz-y da (Véase nel casu d'asoleyar), y con elli los bonos falantes patrimoniales del idioma, ¿nun tará equivocáu l'autor de LNA con esi usu del llinguax artificiosu? ¿Nun te paez? ¿Pa qué falantes escribe?

Per otru llau, ésti nun ye un blog de crítica política, como Diestru diz: Yelu de lliteratura. Y habrá que criticar usos lliterarios, ente ellos el llinguaxe.

Salú

LA NACIÓN ASTURIANA

El xanu\\\'l caborniu — Sun, 03 Feb 2008 21:34:31 +0100

1-Garrar el significáu de "cadarma" que más interesa pa criticar el llibru nun ye imparcial.
2-Sigo manteniendo lo dicho sobre los grupos consonánticos cultos.
3-La crítica que se fai al llibru sofítase, fundamentalmente, nestes cuestiones.
4-Escribir "cumo" o "no lliterariu" choquen cola normativa, y nun me val la xida de les variantes. La central y la oriental tamién lo son.
5-Presuponer que'l llibru nun va llegar a los llectores nun tien nada que ver con crítica dala. Esa decisión pertenez-yos a los llectores.
Un saludu.

LA NACIÓN ASTURIANA

Dalmacio — Thu, 31 Jan 2008 11:13:51 +0100

A min les discusiones estilístiques o filolóxiques paécenme secundaries. Toi por dicir qu'el tiempu dirá si la xente asturiano acaba pronunciando "instancies" en cuenta d'"istancies" (que ye lo que pronuncia anguaño), pero ensin un apueste pola oficialidá y la normalización de la llingua paezme que nun va haber oportunidá pa que pase eso. Por cierto, el diccionariu de Arias que ta en La Nueva España nun ye normativu. El llibru de Carlos X., quitando cuestiones d'estilo que me puen prestar más o menos, amuesa, efeutivamente, que se pue escribir filosofía n'asturianu, pero amuesa tamién 1) que l'ensayu sobre la identidá nacional asturiana alica, 2) que'l nacionalismu pue caltenese dende posiciones d'esquierda y 3) que los nacionaliegos nun son una triba (nin una tribu) de xente inorante (o "ignorante") ya indocumentada. Darréu pue discrepase coles tesis concretes del llibru sobre'l dieldu, la cadarma y la sobrocadarma d'Asturies, o colos sos usos de la hestoria. Pero esi ye otru cantar. Un saludu.

LA NACIÓN ASTURIANA

diestru — Tue, 29 Jan 2008 19:15:00 +0100

Munchas gracias a toos polos vuesos comentarios.

Encamentar a Xanu'l Caborniu tamién l'usu del Diccionariu Xeneral de la Llingua Asturiana, agospiáu na páxina del diariu de La Nueva España, unde:

*Asoleyar:

1. Solear [Ac. Pr]. Solear, orear [Lln]. Asolear [Cg. Tox. JH]. Tomar el sol [Lln. Pa. Sb. Ay. Ll]. Poner al sol [Lln. Pa. Cb. Cp. Ac. Llg. Sr. Ay. Ri. Tb. Md. PSil] la ropa [Oc]. 2. Secar al sol [Cn]: Estó asoleyándome nesti requexu [JH]: Asoleyamos bien les cebolles [Sr]. Ri. Qu. Tb]: A los políticos présta-yos muncho asoleyase (sic) [Ri]. 3. Contraer una insolación [Lln]. 4. Hacer o hacerse ver [Tb]: Muchu t’asuleichas [Tb]. 5. Contar un secreto [Lln. Pa. Ay]: Anda asoleyándolo per ahí a todos [Pa]: Nun faen ma asoleyar les faltes del emu [Ay]. 6. Chismorrear, murmurar [Lln]. Murmurar con mucha publicidad de una persona [Ll].7. Dar a conocer, publicar [Mi].

Frases hechas y locuciones: -se ‘tomar el sol’ [Pb. LV. Lln. Pa. R. DA]. ‘ponerse al sol’ [Lln (S). Cg]. ‘coger una insolación’ [Arm].

Dichos, refranes y textos de literatura oral: El que per Navidá s’asoleya, per Pascua quema a lleña [LC]. El que n’agostu lu fai, en mayu lu asoleicha [Sm].

*Cadarma:cadarma, la.

1. Esqueleto [Lln. Pa. Llg. FCai. ByM. AGO]. Esqueleto, conjunto de huesos [Ll]. Cadáver [AGO. ByM]. 2. Armazón [Lln. AGO]. 3. Persona muy delgada [Lln], desfallecida [Lln].

Documentación literaria: “Cadarma se llama en Asturias un hombre flaco que no tiene sino huesos hueso” [GP a. 1788].

Magar que'l Diccionariu Académicu sía una presea indispensable pal usu de la llingua, creo que'l diccionariu xeneral de la llingua asturiana, feichu por Xose Lluís García Arias, arima meyor l'idioma a la fala del pueblu.

El tiempu dirá.

A "L'amiegu de la única llingua d'Asturies" agradezo tamién el tou comentariu, anque teo que dicir que mui bien nun lo entendí. Si se refier a que la mia crítica adolez de partidista, antipartidista ou favoratible a dalgún partíu ou ideoloxía dicir que tranquilu; feixe la crítica dende la oxetividá que me proporciona la mia "Non Militancia" en nenguna de las organizaciones políticas asturianas.

Salú ya que nun escaya!

LA NACIÓN ASTURIANA

l´amigu de la única llingua d´Asturies — Wed, 23 Jan 2008 22:14:01 +0100

Pemeque la to crítica peca de suxetividá.

LA NACIÓN ASTURIANA

El xanu\'l caborniu — Wed, 23 Jan 2008 20:16:26 +0100

Diccionariu de l'Academia de la Llingua Asturiana:

Cadarma: 2. Conxuntu (d'elementos encima de los que se constrúi daqué).

Asoleyar:1. Poner al sol.

Nota de mio: adaptación de los grupos consonánticos cultos = criteriu cimeru de corrección normativa. ¡¡Cá!!.

Más que probable, de Xaviel Vilareyo

Ateyavana — Sat, 01 Dec 2007 16:54:17 +0100

Estimáu Xaviel Vilareyo:
Cuando un autor gasta más tiempu en construyir el so currículum que n'escribir la so obra da la medía de les sos espectatives.
Esta páxina debería ser un foru d'intercambiu d'opiniones sobre llectures, paezme, non pa que dupliques l'autopromoción que ya cuelgues en: http://xavielvilareyo.nireblog.com (ya ves, faigote promoción gratis).
Salú.

Bienllegaos, afayáivos

xaviel+vilareyo — Mon, 26 Nov 2007 20:39:25 +0100

--------------

La causa más probable de Xaviel Vilareyo

calipso — Wed, 21 Nov 2007 17:17:17 +0100

Nun veo per nenguna parte les virtúes a les que se refier Anxel Alvarez Llano, por eso con ánimu de polemizar plantexo: ¿A qué llama "descriptivismu preciosista"? Na mitá de los rellatos nun hai nenguna descripción, nin preciosista nin non preciosista. ¿"Acertada introspección de los personaxes"? ¿Tal vez nel usu de la comparación ente un estante con conserves y una "esposición d'arte pop moderna ya interactiva" p'afondar na psicoloxía d'una anciana? P'acabar, el supuestu "tempus" ye morosu (por nun decir pelmazu) y la llingua qu'utiliza ta llena d'espasmos como "Hespaña", "amuesadores" (¿qué serán?), "nidio" por "claro" (castellanismu mui espardíu, que fai equivalentes "nidio" y "nítido"), "acostafecha" col significáu de "seguro que", "misa esperteya", "tamién préstame", etc.

La causa más probable de Xaviel Vilareyo

J. A. Gayol — Mon, 19 Nov 2007 10:32:39 +0100

Petecíame facer un apunte namái. Toi d'alcuerdu con Ánxel no que diz de que la Xeneración del Compromisu ye "un términu que a mí cuéstame trabayu entender". A min tamién.
Meter nel mesmu sacu a Martín López-Vega y Elías Veiga, a Naciu Varillas con Ana Vanesa Gutierrez, paezme asuntu bien cazalbu. ML-V y AVG tán más na llínia de Xuan Bello o Berta Piñán, d'una lliteratura mui definida. Elías Veiga o Naciu Varillas abúltenme autores estremaos de los anteriores ya inclusive ente ellos.
¿Y por qué nun ta Xulio Arbesú nesta xeneración? Entamó allá pol 2000 (falo de memoria) a publicar llibros...
¿Y por qué "del Compromisu"? A min métenme dientro y nun fago escritura militante nin comprometida con nada, que nun sía iguar una obra coherente, sobre temes mui determinaos, que nun son agora pa trayer equí.
¿O ye que s'escribe pa llograr la oficilidá? El compromisu col asturianu téngolu a nivel personal, pero si mañana s'oficializa voi siguir escribiendo n'asturianu (ya en castellán).
Quien quiera escribir mensaxes pro-bables (o probables) en forma noveles o cuentos paezme un opción perbona y respetadísima. Ensin embargu, cuido que la mayor parte la xente ta escribiendo con total naturalidá y na llingua que-y peta, ensin apoloxismos nin compromisos más allá de los lliterarios. Y esa sí que ye anguaño la principal característica de la lliteratura asturiana: yá nun hai escritura militante como n'otros tiempos. Lo que nun quita pa que, quien quiera, puea facer escritura militante o probable o como se quiera llamar: la maxa del arte afáyase na llibertá del artista, que nun pue tener cortapises temátiques o na so voluntá ideolóxica o moral. L'enfotu col que s'escribe ye llibre dafechu.
Y finalmente, ¿por qué me tracamundíen el nome al meteme nesta xeneración, y dexo de llamame José Ángel (un nome bien guapu y que me presta un güevu) pa pasar a llamame Xosé Ánxel, un señor que nun sé quién ye? ¿Por qué nun-y cambíen el nome a José Luis Rendueles? Misterios...
Bono, un saludu y felicidaes al blog.

Vía de serviciu

unu menos — Wed, 07 Nov 2007 23:58:48 +0100

Home, yo creo que falta xente y sobra xente. Nun creo qu'eso puea nomase amuesa antolóxica o dalgo similar. El problema ye lo mesmo que-y pasa a Formientu (la revista): pensamos que con tal de que tea escrito en llingua asturiana yá val. Hai dalgún cuentu que sí val, claro, pero la mayoría perroneros...

El Buscador d'Hestories, Cristina Muñiz Martín, Trabe, 2007

llectora intempestiva — Mon, 05 Nov 2007 15:59:21 +0100

Güei entamé a lleer Onde pisen poques güelles y la verdá que se llee mui rápido. Cuando lu acabé yá comentaré con conocimientu de causa.

El Buscador d'Hestories, Cristina Muñiz Martín, Trabe, 2007

Ateyavana — Sat, 03 Nov 2007 10:18:34 +0100

Toi d’alcuerdu con delles coses de la crítica de Xosé Ánxel Gayol, pero non con toes. La primer historia da’l títulu al volume, y ye una novela curtía que tampoco me paez que furrule. Yo veo-y como referente claru “La Cosa del Pantano”, con esi protagonista viviendo aventures distintes y el cantu a la Natura.
Cristina Muñiz tien frescura y munchu remangu a la hora d’escribir, eso nun-y lo pue quitar naide. Ye anguaño la maxinación más fértil de tolos nuestros escritores, con esi tonu surrealista y desenfadáu qu’algama traxedia y comedia nun mesmu rexistru y que lleva a les sos últimes consecuencies como naide.
Pero a la vez, yo veola poco lliteraria, como si tuviere tovía probando la so voz y nun s’alcontrare tovía a gustu escribiendo. ¿Falta de llectures? ¿Tovía buscando la so voz propio? Eso fai que dalgún de los cuentos nun furrule porque la maxinación de l’autora llévalu hasta les últimes consecuencies y piérdese/piérdenos nel camín, hasta que nun sabemos qué mensaxe nos quería amosar.
Sacantes eso, y la so forma d’axetivar (que nun m’acaba de prestar del too), paezme una escritora a la qu’hai que siguir.
¿Qué vos paeció a vosotros?

La muyer que mira pasar la vida

Ateyavana — Thu, 11 Oct 2007 16:22:49 +0100

Agora mesmo ocúrrenseme milenta, la verdá.
Fai'l favor de mirar el to corréu,anda.
Salú.