Francisco Álvarez, En poques pallabres. Uviéu, Trabe, 1998 [Incla interior, 34]

Rescato otru llibru del cementeriu de los llibros olvidaos, anque con un poco mieu, porque l'anterior despolináronlu na biblioteca dempués de yo devolvelu (y cuento que nun se van esllombar a buscalu).

Francisco Álvarez entama esta obra diciendo que nun ye escritor, y yo digo "vaya pena". Porque los cuentos que se presenten nesti llibru lleguen a ser verdaderamente interesantes, incluso más que la obra de xente que sí s'otorga a sí mesmu esa categoría.

Dempués l'autor sigue con que los rellatos que componen esti volume son hestories pequeñes, en pretensiones y en tamañu, en pensamientu y n'obra, ataes la mayor parte d'elles a eso que llamen realismu ; y que munchos d'ellos dében-y la esistencia a los catorce meses que cumplió Álvarez en Villabona por insumisión (qué olvidada ta tamién esa inxusticia pa cola mocedá comprometío d'hai una década). Y pa mi, la humildá d'esti planteamientu que presenta'l prólogu fai que los resultaos que dempués s'atopen queden engrandecíos.

Los cuentos varíen en temática y grau de perfección. Dalgunos pequen de demasiao efectistes (na vena de los Relatos de lo inesperao de Roald Dahl), y véselos venir de lloñe. Pero los hai tamién d'un realismu que sorprende polo peracabao. El llibru entama con mucha fuerza na temática marxinal, que non sorprende conociendo l'oficiu del autor (periodista) y ónde s'escribieron los relatos, con "El cuadru" y "Tiempu perdío"; y pasa al poco a lo que los anglosaxones llamen slice of life (tayada de vida) con "Vieyos amigos", el perguapu "Paséu dominical" y "Confesiones", onde se-y ve al autor oreya pal diálogu naturalista (tamién mui destacable nel mentáu relatu "Tiempu perdío") y tamién al xéneru fantásticu (baxando un poco'l nivel). Amás, hai tamién visiones de la profesión periodística: del sensacionalismu un poco estereotípicu en "Primera páxina"y la figura del periodista perseguíu políticamente en "Trenta minutos", qu'amás amuesa una técnica francamente innovadora (presenta lo que va faciendo'l personaxe cada pocos minutos). Nel sen esperimental atopamos "Seseos", una historia pa lleer en voz alta onde la fonética roba protagonismu al argumentu.

 Bono, con too esto qu'acabo de cuntar nun soi quien a esplicame cómo ye qu'esti home nun publicó más testos lliterarios dende esti llibru, que como veis nun tien desperdiciu nengún. Si dalguién lu conoz que-y diga de mio parte que nun se pue facer esto de poner la miel nos llabios a los llectores y dempués tar diez años ensin sacar nada. Yo quiero más llibros d'estos nes estanteríes de les biblioteques, y tamién quisiera, si nun fuere muncho pidir, que nun pasaren tan desapercibíos.

Pa finar, infórmovos de qu'esti llibru ta disponible nuna parva de biblioteques públiques. Miráilo per equí , seguro que dalguna vos pilla cerca.