VV.AA Vía de Serviciu. Xixón, Suburbia Ediciones, 2007.

Anque diba poner esto como comentariu, tómome la llibertá de publicalo como entrada principal pa que apaeza como actualización y da-y un poco de vida al blog.

Pa entamar quiero dicir que me paez una recopilación digna, nin más nin menos. Pel llau editorial, ensin ganes d'ofender, sedría deseable que se punxere más atención a la corrección d'errates ortográfiques y non ortográfiques, anque tristemente ésti ye un puntu débil de tola industria del llibru asturianu (mal de munchos...). Pel llau lliterariu, tengo la mio escala particular:

• Cinco cuentos prestáronme : "Perreríes", "Colos cuatro sentíos", "Xinebra", "Ficha" y "Catedral", anque me decepcionó un poco que Pablo Texón quixere dir sobre seguro y nun presentare un relatu inéditu (si fuere en revistes, bono, pero un mesmu rellatu publicáu en formatu llibru dos vegaes paezme poco considerao pal llector-comprador). Los dos primeros son los que me paecen meyores pol so impautu y lo acertao de la narración, y amás llámame l'atención la coincidencia de temes ya imáxenes ¿podemos pensar nun pautu o apuesta ente los autores, al estilu de los clásicos Byron-Polidori?
•  Nun me da más por seis d'ellos, anque los lleí con cierta gracia: "El silenciu y más nada", "El cementeriu de Lechatnoir", "L'arume la to ausencia", "La quema", "La entrevista" y "L'arume de la mirra".
•  Dempués, hai tres cuentos que, si yo fuere la editora, nun taríen ellí porque, pa mio idea, un llibru ye una cosa importante y estes histories lliterariamente abúltenme floxes y poco trabayaes. Son "Podredume", "¿Qué hora ye dientro de mi?" y "L.lobos d'anguano".

La mio propuesta: dar puxu a la publicación de cuentos en revistes ya internet y esbillar, esbillar, esbillar pa que sólo lleguen a les editoriales les pelres (naturales o cultivaes).  Y nun tener priesa por ver el nome d'ún nun llibru: nun me paez casualidá que los cuentos meyor paraos de la mio crítica seyan de los autores más mayores o que lleven más tiempu escribiendo y publicando.