Vía de serviciu. Muestra de nueva narrativa. Suburbia Ediciones, 2007.

Últimamente na rede fálase muncho de la “xeneración nocilla”: ye una etiqueta que quier ponése-yos a los escritores españoles más nuevos. Parezse abondo a otres operaciones de llanzamientu editorial, como la famosa “xeneración kronen” de mediaos de los noventa. Quiciás pueda falase d’un grupu xeneracional estremáu coles sos carauterístiques específiques, el debate ta abiertu. ¿Pero hai dalgo parecío na lliteratura asturiana?
L’antoloxía Vía de serviciu que ta acabante sacar al mercáu la editorial Suburbia, puede responder a esa entruga. Vía de serviciu axunta catorce relatos escritos por autores nacíos ente 1975 y 1987. Esto ye, los escritores más mozos de la nuestra lliteratura. Ensin embargu, el fechu de contar con xente tan xoven nun quier decir que seya esta una recopilación de testos primerizos. Pel contrariu, l’antoloxía puede entendese como la primer muestra “canónica” d’esa nueva xeneración, al estilu de lo que significó Nórdica pa la poesía asturiana de la xeneración anterior.
Los relatos de Vía de serviciu demuestren que los autores más mozos nun rompen del too coles señes d’identidá del Surdimientu lliterariu. Asina, cuentos como “Catedral” de Pablo Texón Castañón o “L.lobos d’anguano” d’Ezequiel Cala, remiten al realismu secu y casi minimalista d’escritores como Pablo Antón Marín Estrada o Alfonso Velázquez. Ye un realismu mui influíu polos maestros de la narrativa anglosaxona. El valor de cada cuentu tien que ver más col mundu personal de cada autor que con una diferencia xeneracional en sí mesma.
Hai rasgos, per otra parte, que sí nos sirven pa falar d’un grupu xeneracional unitariu. En primer llugar, la falta de prexuicios ideolóxicos. Equí ta ausente la figura del escritor militante, del que tantu se faló a propósitu de la lliteratura del Surdimientu. Per otra parte, anque la mayoría de los cuentos nun tienen como marcu’l mundu rural, los que sí se desarrollen nesi escenariu, nun lo faen dende la recreación del paraísu perdíu. Ye’l casu de “Perreríes” de Pablo Rodríguez Medina o el citáu “L.lobos d’anguano”. La única esceición ye “L’arume la tou ausencia” de Penélope Miranda.
Anque’l conxuntu del llibru ye d’una calidá más que notable, quiciás habría que recomendar mui especialmente los relatos “Colos cuatro sentíos” de Naciu Varillas, “Ficha” de Pablo X. Suárez y “El cementeriu de Lechatnoir” de Pablo Rodríguez Alonso, aparte de los citaos de Medina y Cala.
Destacar por último que sólo dos de los catorce antologaos son muyeres y sólo dos de los cuentos tán escritos n’occidental, lo que ye un reflexu pa lo bueno o pa lo malo de la realidá de la nuestra lliteratura.

Calipso