Pue que vos pasara dacuando, si sois auténticos frikis o aventaos d'estes movides, qu'al averavos por curiosidá a la obra d'algunu d'esos estraños paisanos qu'escribíen n'asturianu , pa bien o pa mal, nel añu de la burra y les carretes, en tiempos nos que nun había teles nin plaiesteisions, nin tan siquier equipos de fúbol colos que flipar o deprimise, tiempos qu'equí los frikis-aventaos d'estes coses podemos llamar guapamente "anteriores al surdimientu", vos alcontráreis con una guapa edición de Trabe y una tovía más guapa introdución d'Antón García, escrita con una buena documentación detrás, un puntu de vista intelixente y orixinal y esa prosa equilibrao y claro d'ún de los que ye, magar la so curtia obra, ún de los meyores novelistes na nuestra llingua. A mi particularmente pasóme colos prólogos de les dos antoloxíes de cuentos "anteriores al surdimientu" que formen parte del catálogu de Trabe, que presentaben una visión del fechu lliterariu asturianu que polo menos pa un servidor, probe inorante, resultaba nueva dafechu. Una visión que, fuera de les cencielles enumeraciones y afirmaciones milenta vegaes repetíes, qu'infesten tovía la insuficiente Historia de la lliteratura asturiana , pretendía esplicar abarcativamente la nuestra ruina tradición lliteraria -tradición al fin y al cabu - atendiendo nun solo pa la nómina d'obres y autores conocíos, sinon tamién pa les cuestiones sociolóxiques al rodiu d'elles, pa les rellaciones ente escritores y los problemes que plantegaba la recepción de les obres.
Xeneraciones y dexeneraciones vien a ser una recopilación de toos estos testos qu'Antón, nel so llabor d'editor y estudiosu de la nuestra lliteratura, nos foi dexando dende l'entamu de los años 90. Estructuráu cronolóxicamente a mou d'hestoria lliteraria- ta a piques de selo, a nun ser pol lóxicu fragmentarismu -, esti primer volume inclúi artículos qu'abarquen dende los oríxenes de la nuestra lliteratura hasta'l primer terciu del sieglu XX. Previo a ello, inclúi l'autor una "Propuesta de periodización de la lliteratura asturiana", yá albidrada na so Lliteratura asturiana nel tiempu(1991)y que ye ensin dubies la meyor y más razonada de les que se dieron hasta agora na historiografía lliteraria asturiana, indispensable pa cualquiera que se ponga a trabayar sobre'l tema. Nos siguientes capítulos, acordies con esa periodización, van dir desfilando énte'l llector los susodichos paisanos: aquel flipáu Caveda, poeta del volkgeist (que por ciertu que geist más chungu teníemos yá daquella) y de la irreverente "Defensa del peu"; L'Acebal de la boína colorada y l'Asturies total; Marcos del Torniello, graciosín de turnu; el más que pro-bable fundador de la COPE Fernán-Coronas. Con ellos, arrodiándolos, penriba d'ellos, dando-yos un sen que munches vegaes nun tienen de mano, vamos a contemplar el so ambiente vital y intelectual, la sociedá asturiana de les sos dómines y, nella, el melgueru dialectu bable como hiperproblema estrasensorial, algo asina como güei, productu d'enrevesaes ecuaciones culturales y de millones de preguntes tiraes al aire qu'habrá quiciás qu'esperar San Pedro respuenda.
Una obra en definitiva básica y altamente recomendable, polo completa y documentada, pero tamién pola amenidá de la prosa cola que ta escrita, pa quien se proponga estudiar la lliteratura asturiana o mesmamente pal llector común (non tan común si llee n'asturianu)que sienta interés por eses dómines escures, una escuridá que la más gorda Historia de la lliteratura asturiana, por ciertu, nun resuelve en bien d'ocasiones.

Esta ye una llista de obres narratives de los últimos diez años. Nun tán ordenaos siguiendo nengún criteriu.

1.      Les ruines, Xandru Fernández

2.      Díes de muncho, Antón García

3.      Abocaos, Berto Cobreros

4.      Escrito na ceniza, Xosé Nel Riesgo

5.      Llue, esi mundiu paralelu, Xe M. Sánchez

6.      Aventures, Milio Rodríguez Cueto

7.      El día que nos llevaron al cine, Paquita Suárez Coalla

8.      La tierra entero, Berta Piñán

9.      Histories d’un seductor (memories d’un babayu), Miguel Rojo

10.  Cuentos chinos, José Luis Rendueles

11.  Argonautes, José Ángel Gayol

12.  Catedral, Pablo Texón

13.  Cuentos con neños, Xulio Arbesú

14.  Les falcatrúes del demoniu, Xulio Viejo

15.  Nunca nun te fies de la xente que nun enseña los dientes al rise y otros cuentos

• Copia la llista nel formulariu pa dexar comentarios
• Borra los que nun lleeras
• Ordénalos según el to propiu gustu
• Suma a la llista trés llibros más y colócalos tamién.

Podéis facelo sobre la llista orixinal o sobre la llista d'un comentarista.

¡Animáivos! 

Esti ye'l testu de la comunicación que lleí'l xueves nel II Conceyu Internacional de Lliteratura Asturiana. Espero que vos paeza interesante.

Lleer el restu d'esta entrada

Yá pasó más d'una selmana dende que se colgó la encuesta y los resultaos son claros: paez que la xente que pasa per equí mayoritariamente quier que se fale de llibros n'asturianu (nesti momentu hai 31 votos nesti sen, frente a 3 que piden que se puea falar de ralo en ralo de llibros n'otres llingües). Sicasí, nun seré yo como alministradora la que torgue que se publique cualquier crítica, seya del llibru que seya.

Yá somos siete los llectores rexistraos que tamos equí dispuestos a lleer y comentar, y yá dellos nos animemos a colgar crítiques propies y ayenes. De toes maneres yera bueno que más xente se xuniese al proyeutu o que polo menos, de la que pasa per equí (cosa que yá faen bastantes, como amuesa'l contador de visites) dexare dalgún comentariu, anque solo fuere pa saber si vos presta o non la iniciativa, l'estilu de los comentarios, si vos paez que falten coses na páxina o cualquier cosa que se vos ocurra.  ¡Manes al tecláu!

Dempués de dos selmanes seguimos ensin tener crítiques como tales, pero yá hai dellos interesaos en participar y, como nun podía ser d'otra manera, idees nueves que lleguen con ellos. Por ello ponemos la encuesta que podéis ver a la derecha, pa que tou aquel interesáu que pase per equí pueda participar del destín d'esti proyeutu. Nuna selmana decidiráse qué pasa colos requisitos de publicación.¡Votái polo que vos paeza más afayadizo!

Bono, entós, rompo yo'l xelu de la manera menos ortodoxa: aprovechando una noticia que nun tien que ver cola lliteratura n'asturianu (sinón cola Lliteratura d'una muyer ni escribe nesta llingua nin tien nada espublizao nella) pa facer una reflexón sobre esta.

Siempre se fala, sobre too a propósitu de les compilaciones d'escritores mozos n'asturianu, de que na nuesa lliteratura nun hai escritores que rescamplen, que te dexen esteláu, maduros, con oficiu... Pero ¿qué escritores tenemos? ¿A naide se-y ocurrió pensar que los más de los nuesos novelistes nun pasen de los 50? Nun se escribe bien, nin se conocen los requexos de la condición humana (los que faen al llector respigase) d'un día pa otru. Hasta escribir les histories de borrachos y polvos mal echaos que tan patayos paecen, Bukowski tuvo qu'echar 60 años andando pelos chigres.

Too esto vien a cuentu de que Doris Lessing acaba de convertise na ganadora del Premiu Nobel de Lliteratura del 2007 (la 34ª muyer que lo algama) a los sos 87 años, 57 d'ellos como escritora. Nacida en 1919, non sólo tien visto camudar el nome de la tierra onde nació (Irán) y n'onde vivió la so mocedá (Zimbabue), sinón tola faz del planeta a tolos niveles: política, mediu ambiente, rellaciones ente homes y muyeres,... Nun lo vio namás, sinón que participó nello. Y eso nótase na so escritura. Nun hai más que lleer La bona terrorista pa dase cuenta de lo que conoz tanto los movimientos izquierdistes como la sicoloxía humana.

N'asturianu, nin la xente que vivió too eso escribe (cola posible esceición del desapaecíu Mánfer de la Llera, qu'escribió poca narrativa) nin la qu'escribe lo vivió (lo cual nun ye, evidentemente, culpa d'ellos). Esperemos qu'el tiempu nos regale escritores vieyos qu'escuquen la vida como Doris Lessing o Mario Benedetti. ¿Ocúrresevos dalgún otru escritor (de cualisquier nación) con varies décades d'esperiencia?