Normes de publicación en llectoresyllectures.

Esti blog naz col envís de facer un archivu de crítica lliteraria asturiana plural ya independiente, al empar que rigorosu. Poro, fáense necesaries unes pequeñes normes de publicación pa lo formal y unos criterios mínimos de calidá:

1. Podrá publicar en llectoresyllectures toa aquella persona a la que-y pete. Lo único imprescindible ye ser un apasionáu de la lliteratura y la llectura. Polo demás, sólo hai qu'escoyer un nick y ponese en contautu cola alministración del blog.  

2. L'únicu requisitu será que la crítica seya sobre un llibru escritu n'asturianu o traducíu a esta llingua.

3. La crítica habrá de ser razonada y sincera. Nun fai falta ser un expertu en lliteratura, sólo escribir namái que dende l'amor a la llectura y l'interés pola nuesa llingua, ensin otros intereses que desvíen les reseñes. Por supuestu, esto supón que tamién se puen facer crítiques positives :)

4. Nun se tolerarán insultos nin espresiones ofensives o irrespetuoses pa colos autores de los llibros o cualquier otra persona. Una falta a esta norma sera motivu pa esborriar la crítica.

5. La estensión y el títulu de les entraes son llibres.

6. Enantes d'entamar cola crítica en sí habrá de poner una pequeña reseña biblográfica estandarizada onde figure autor, títulu (en cursiva), ciudá, editorial y añu de publicación. Por exemplu:

Vicente García Oliva, El norte. Xixón, Llibros del Pexe, 1991.

7. De la que se publica la entrada habrá que l'archivar na estaya correspondiente: poesía, narrativa, teatru, ensayu o otro.

8. Tamién se podrá, de cuando en vez, publicar otru tipu d'escritos (noticies, por exemplu) si tán venceyaos al mundiu de la lliteratura.

9. Podrán publicase cuantes crítiques-y pete a caún de los participantes y nel momentu que-y pete, ensin compromisu.

10. Ye absolutamente imprescindible disfrutar cola llectura y ser capaz de facer crítiques constructives.