Xose María Vega, Un sieglu de nós. Xixón, vtp, 1997

Como véis y como el mio propiu alcuñu indica, soi aficionada a sacar llibros de la biblioteca de los que llamen l'atención a pocos (ésti en concreto solo tien seis sellos d'empréstamu, y los dos últimos son de xineru de 2008 y de ochobre de 1999).

Voi entamar esta crítica con una anécdota. Cuando estudiaba na facultá (filoloxía inglesa) , un profesor con muncha sorna nos descubrió esta páxina web onde podíamos atopar los clásicos de la lliteratura resumíos nun testu que se lleía en menos d'un minutu. Entós, por exemplu, Fiesta, de Hemingway reduzse a:

Narrador: Tábemos n'Europa, dempués de la guerra. Tábemos deprimíos. Chumábemos muncho. Siguíemos deprimíos.

Y Otelo, de Shakespeare queda en:

Yago: La to muyer ponte los cuernos.

Otello: ¿Ah, sí? (mata a la muyer). ¡Mierda, yera mentira!

¿Paez que pierde, non? Pues esa sensación tuvi yo lleendo esti llibru. La novela trata la hestoria d'una familia dende 1898 hasta 1998, una especie de ciclu, qu'entama y acaba nel mesmu llugar, anque los protagonistes van cambiando al son de los tiempos; y cuéntala en 17 capítulinos d'unes poques páxines, tratándo de condensar lo asocedío ente ún y otru.  Asina, van pasando 1898, 1899, 1908 (dos capítulos), 1917 (otros dos), 1922, 1927, 1929, 1936, 1948, 1956, 1968, 1975, 1983, 1991 y 1998.

Lo positivo y digno d'agradecer ye que ye una novela que se sal un poco del tema del pasáu campesín y la crudeza de la guerra civil y posguerra, tan trataos na lliteratura tanto asturiana como española en xeneral. Poles páxines d'esti llibru non solo pasen campesinos, emigrantes fallíos, moces de sirvir y obreros sinon tamién industriales, xugadores del Real Oviedo, pescaderes rabaneres de Cimavilla, atechaos desclasaos, ames de casa d'El Coto, estudiantes h.ipiosos, llicenciaos en paru y tola fauna astur que pudo nacer y reproducise nel sieglu XX. El tema de la guerra civil, como se pue aldovinar viendo la rellación de capítulos, sólo sal directamente nún d'ellos y dende un puntu de vista "atípicu" pa la nuesa lliteratura reciente. La historia paezme bien filada y atropa arteramente a toles clases sociales del nuestru pasáu, y dellos ambientes urbanos y rurales del país.

¿Qué pasa entós? ¿Por qué nun acabé la obra diciendo "¡qué gran llibru!". Pues precisamente, porque nun ye un gran llibru: malpenes 110 páxines de  12x8 cms. Nesti casu, pal mio gustu, lo bueno si breve nun ye necesariamente meyor. Lliterariamente, la historia circula atropellada, ensin casi llugar pal diálogu y nun digamos yá pa la construcción del personaxe: les más de les veces, l'escritor nun tien paciencia pa enseñanos como ye caún y díznoslo de mano, si un ye inocente, si otru ye calavera... Dempués hai algún qu'otru puntu negativu más, como ye dacuando l'usu d'un asturianu innecesariamente irreal (anque tampoco molesta muncho) y la visible inquina ideolóxica del autor nos últimos capítulos, que pienso que se podía resolver con más sutileza, tratándose d'una obra lliteraria y non propagandística.

 En conxuntu foi un llibru que me pagó la pena, anque yo quería más lleer La casa de los espíritus, y cuento que la historia daba pa ello.

"Los ámbitos de la Nación Asturiana"

El próximu xueves 5 de feberu tendrá llugar n'Uviéu la presentación d'un nuevu llibru d'ensayu de Xaviel Vilareyo que tien por títulu Los ámbitos de la Nación Asturiana. La presentación tendrá llugar na Biblioteca del Campu San Francisco a les 6 de la tarde y marcará l'entamu d'una nueva visión d'Asturies, la reivindicación del so territoriu históricu. La presentación correrá a cargu del escritor y políticu Humberto Gonzali.

La lliteratura asturiana d’ensayu da un reblagu importante con esta nueva aportación de Xaviel Vilareyo, nun documentáu ensayu sobre l’asturianidá y sobre la historia del territoriu d’Asturies a lo llargo los sieglos y sobre la permanencia de los rasgos identitarios. Ye la historia la que lexitima’l conceptu de l’asturianidá a lo llargo del tiempu. Con esti interesante trabayu, Xaviel Vilareyo pon al algame de toos la verdadera historia tapecida d’Asturies, la historia d’una minoración física y la denuncia d’una usurpación y d’un olvidu colectivu. El fechu de que l'ámbitu espacial del país asturianu nun coincida coles llendes alministratives actuales nun significa que se tengan qu'asimilar éstes como l'únicu marcu posible de referencia. La historia real ye imposible escaecela nin traicionala porque con esti llibru tará presente a partir d’agora nel nuesu pensamientu colectivu como asturianos. Un ellaboráu ensayu que pon al descubiertu les interesaes mentires que se ficieron alrodiu la historia de los asturianos. Esti llibru dexa n’evidencia que la historia d’Asturies ye una manipulación interesada de los que pretendieron afitar un robu y un expoliu sobre la tierra asturiana. El llibru de Xaviel Vilareyo servirá p’abrir los güeyos a munchos asturianos sobre la estafa histórica que supunxo la provincialización n’Asturies, o meyor dicho, la imposición a la trágala de la provincia ovetense y la posterior desasturianización de tol país. A los asturianos se nos pretendió ocultar y tapecer la nuesa historia pa evitar que recuperáremos el nuesu lexítimu llugar nella. Los Derechos Históricos d’Asturies son irrenunciables porque sinón taríemos renunciando al nuesu propiu ser como pueblu. Esti llibru vien a recordánoslo con aciertu yá qu’olvidar la historia de los pueblos, nel casu d’Asturies pue ser sinónimu d’un suicidiu colectivu imperdonable. Xaviel Vilareyo (Mieres del Camín, 1967) ye llicenciáu en Derechu pola Universidá d’Uviéu. Escritor, poeta y ensayista en llingua asturiana pertenez a la Tercer Xeneración del Surdimientu. Recibió los premios de lliteratura Vila de Sarria, Elvira Castañón, Valentín Andrés y Xeira de narraciones.

----------------------------------------------------------------------

Préstanos convidate a la presentación del llibru

Los ámbitos de la Nación Asturiana

de Xaviel Vilareyo

que tendrá llugar na Biblioteca del Campu San Francisco

el próximu xueves 5 de febreru del 2009 a les 6 de la tarde.

La presentación tará a cargu d’Humberto Gonzali.

----------------------------------------------------------------------