Bono, pos apienza eiquí la mia collaboración -humilde por outru llau- nesti blog de crítica lliteraria, por mor de la sua "Alma Mater", fundadora ya impulsora Laura.

Colo que, dempués d'agradecimientos, vou falar un poucu d'un llibru, Xente de Perende.

L'autor d'esti llibru ía'l Caderalgu d'Economía de la Universidá Complutense de Madrid David Rivas.

El llibru vien ser un conxuntu d'hestorias de personaxes que pudieramos llamar "cotidianos", ya cada hestoria ía un cuentu, faciendo en total un númaru de 74 ya outru más, a mou d'espidía ya mui emotivu pal difuntu Xosé Álvarez; Pin el de Conceyu d'Asturies.

David Rivas ía verdá qu'ía un home de talentu. Ya eso vese nas lletras que puen. Tien humor pa contar las cousas. Cuéntalas con bon detaye. L'home tien gracia, ya las hestorias que cunta ser, son amenas ya interesantes. Cunta dalguna tamién "dura", cumo la de los sous buelos paternos, cuando la guerra, qu'impresiona. Outras son entrañables, cumo dalguna hestoria de pixuatos ou de xente mayor. Rellatos hestóricos ya político-sociales de l'Asturies contemporania... En definitva David Rivas tien madera pa ser un de los meyores narradores ne nuesa llingua.

Pero en cuanto al llinguaxe... Tien léxicu abondu, pero pal gustu míu tien una carencia estilística bultable dafeichu.

Nel sou estilu usa dialeutalismos que caxan mal, por exemplu "peitu" por "pechu" nel asturianu qu'emplega. "Cárcele" por "cárcel" ya outras palabras.

El sou asturianu tien tamién un problema col rexistru que l'autor emplega. Albídrase que ta bien usar pa las hestorias que cunta varios rexistros, por mor de los estremaos personaxes qu'apaecen nas hestorias, dende'l pescador pixuetu, hasta'l Caderalgu d'Universidá. El problema ía cuando dambos usan el miesmu llinguaxe, vulgarismos ou cultismos. Esi problema tienlo Rivas, pero ía salvable.

(...)remocicare dafechamente los programes, porque como tán, nun tienen igua, y los estudiantes nun pescancien les llendes científiques(...) ía según Rivas la fala d'un rapaz que deixóu la sua aldea nel conceyu Miranda por un país estraxeiru, ya asina caltién la sua faliella occidental.

Non obstante, en llinias xenerales, el llibru paga la pena, ya si'l llinguax fora más afayadizu, sedría un de los grandes llibros de 2006.

Xente de Perende, escritu por David Rivas ya espublizáu pola Editorial Trabe, Uviéu 2006